എടോ ഹരിപ്രിയേ...



എടോ ഹരിപ്രിയേ...,
നീ എന്നെ പ്രണയിക്ക്വൊന്നും വേണ്ട 
നിലവാരമില്ലാത്ത എന്റെ തമാശകളെ
മഴുമിപ്പിക്കാൻ ഇടം തരാക്കെ 
ചിരിച്ച് തൊടങ്ങ്വാ മതി. !
ഫോൺ വിളികൾ തീരുമ്പോ "ഇനീം വിളിക്കണേ..." ന്ന്
ആവശ്യപ്പെട്ടാ മതി.!!
ബാക് ബെഞ്ചിൽ വന്നിരിക്കുന്നത് 
"നിന്നെക്കാണാനാ... " ന്ന് മറുപടി തരുമ്പോ
പാതി മുഖം പൊത്തി "ശ്വോ..... വയ്യ"ന്ന്
നാണിച്ചാൽ മതി.....!
അപ്പൊ നിന്റെ തൊട്ടടുത്ത് സ്ഥലമുണ്ടെന്ന് തൊട്ട് കാണിച്ചാ മതി..!
(വെർതേ )
ഞാൻ വാങ്ങിത്തരുന്ന ചോക്ലേറ്റുകളെക്കെ കഴിച്ചാ മതി 
"വാങ്ങിത്തേര്യോ..?." ന്ന് ചോയിച്ചാ മതി.
നിന്റെ ഹൃദയമൊന്നും എനിക്ക് വേണ്ട 
അത് കൊണ്ടു നടക്കാനുള്ള സൂഷ്മതയൊന്നുമില്ല.
കാണാതെ പോയ മൂന്നാമത്ത കമ്മലിനെക്കൊണ്ട് അക്ഷയ് ചോയിക്കുമ്പോ
" അയ്യോ...ശ്രീ ഹരി ആയിരുന്നെങ്കിൽ ഇപ്പോ തകർത്തേനേ.." ന്ന്
മറുപടി കൊടുത്താ മതി.
പറയുമ്പോഴും കോൾക്കുമ്പോഴുമൊക്കെ 
" എന്റെ ഹരീ..." ന്ന് ചേർത്താ മതി
പതിവില്ലാതെ മഴപെയ്യമ്പോ, 
ഞാൻ പ്രണയത്തെപ്പറ്റി പറയുമ്പോ 
"വെർതേ പ്രേമിക്കടാ... " ന്ന് പറയ്!
ഒരു കുറ്റ്വോം ചെയ്യാത്ത എന്നോട് പിണങ്ങി 
ഒരു മൂലയ്ക്ക് പോയി ടെക്സ്റ്റ് ബുക്കും വായിച്ചിരിക്കുമ്പോ
അറിയാതെ പോലെ വന്നൊരു ചവിട്ട് തന്ന് 
കനത്തിലൊരു "സോറി" കേട്ടാൽ 
ചിരിച്ചാ മതി.
ഒന്നും വായിക്കാനില്ലാതെ, ചുവരിലെട്ടിച്ച റാങ്ക് ലിസ്റ്റ് നോക്കി 
ഒന്നും മിണ്ടാതെ ചേർന്ന് നിക്കുമ്പോ
പോകാൻ മടിച്ചാ മതി!
കഥ പറയാൻ പറഞ്ഞാൽ 
എക്സാമൊക്കെ കഴിഞ്ഞ് പുറത്ത് പോകാമെന്ന്
വെറുതെ പ്ലാനുണ്ടാക്കിയാൽ മതി.
നിന്റെ കൂടെ നടക്കാനൊന്നും എന്നെ കിട്ടില്ലാട്ടോ , 
അതൊന്ന്വല്ല ഞാൻ പറയുന്നതും
വേറെയെന്നും വേണ്ടടോ...
ഇത്ര കഴിഞ്ഞിട്ടും രാത്രില്, മഴ പെയ്യുന്ന 
എന്റെ രണ്ടു മണി  വരെയുള്ളനേരത്തെ ,
നീ കട്ടെടുത്ത് കെണ്ടോവാറുള്ളത്
നീ അറിയണമെന്നുണ്ട്
അത് മാത്രം മതി.!!

അഭിപ്രായങ്ങള്‍

ഒരു അഭിപ്രായം പോസ്റ്റ് ചെയ്യൂ

Anonymous comments are possible ;)

ഈ ബ്ലോഗിൽ നിന്നുള്ള ജനപ്രിയ പോസ്റ്റുകള്‍‌

സീസൺ

വീണ്ടും കണ്ടുമുട്ടാമെന്നൊരു മൗനത്തിന്റെ മേലാണ് നമ്മളൊന്നിച്ച് ഒറ്റയ്ക്കാവാൻ തീരുമാനിച്ചത്. അങ്ങനെയൊന്നുമില്ലെന്ന് നീ പറയുമെങ്കിലും എനിക്ക് കാണാം , നീ ഒറ്റയ്ക്കിരിക്കുന്നത്, എന്തിനോ വേണ്ടി തിരഞ്ഞു കൊണ്ടിരിക്കുന്നത്. കാരണം നമ്മിലൊരു തിരയുണ്ടായിരുന്നു. കടലൂതിയെറിഞ്ഞ അതിൽ നിന്നും പരൽ മീനുകൾ തീരത്തടിഞ്ഞിരുന്നു. രാത്രിയെ മുഴുവൻ ചൂണ്ടയിൽ കൊളുത്തി നീ കാത്തിരുന്നാലും അവയൊന്നുമിനി നീന്തി നിന്റെയരികിൽ വരികയില്ല. പക്ഷെ, ഞാനതൊക്കെയെടുത്ത് സൂക്ഷിച്ചിട്ടുണ്ട് . (അല്ലെങ്കിലും ഒരു കാര്യോമില്ലാതെ ഒക്കെ പെറുക്കി വെക്കുന്നതെന്റെ ശീലമാണെന്നറിയാമല്ലോ..) ഒരുമിച്ച് മാത്രമേ അവയെ സ്വതന്ത്രമാക്കൻ ഒക്കുകയുള്ളു (അതെ, നാമൊരുമിച്ച്..!) അതിലൊന്നു  പോലും തിരികെ വന്നില്ലെങ്കിലും എനിക്കുറപ്പുണ്ട്, നീയും ഞാനും കണ്ണിൽ കടൽ നിറയുന്നൊരു നേരവുമുണ്ടാവുമെന്ന്...!! നീ തിരിച്ചറിഞ്ഞില്ലെങ്കിൽ കൂടി, ആ നേരം നമ്മുടേത് മാത്രമായിരിക്കുമെന്ന്...!!
കൂടുതൽ‍ വായിക്കൂ

ഐ ലെഫ്റ്റ് ദ റൂം....

ഇനി  നിൽക്കാനാവില്ലെന്നു തിരിച്ചറിഞ്ഞ് ഞാനാണ്  മുറിയുപേക്ഷിച്ച് വാതിൽ ചാരി നടന്നു തുടങ്ങിയത്. അവിടെ ഒരുപാട് പേര് വന്നത് കൊണ്ടല്ല. ഒരുപാട് പേരുള്ള, തിരക്കുള്ള ഒരിടത്ത് തങ്ങുക എനിക്ക് പ്രയാസമുള്ള കാര്യമേ അല്ല. (ജിഗ്‌സോ പസിൽ പോലെ അടുക്കി വച്ച  കട്ടിലുകളിലാണ് ഞാനും ശിവയും അഫ്സലും ഒരു കൊല്ലം ജീവിച്ചത് ) പക്ഷെ, മുറിയിലെ ഏകാന്തതയെ അത്ര കണ്ട് ഞാനങ്ങ് പ്രണയിച്ചു പോയി. എന്റേത് മാത്രമായ കട്ടിലും, അതിനെ മൂടുന്ന പുതപ്പുമെല്ലാം കിഴെയുള്ള തൈലങ്ങളോട് ചേർന്ന് അവിടെയാകെ ഒരു പ്രത്യേക ഗന്ധം വ്യാപിപ്പിച്ചിരുന്നു. ഏകാന്തതയുടെ മണം. രണ്ടു പേർ മാത്രമുണ്ടാകുമ്പോഴുണ്ടാകുന്നത്.                *      *      * ഉണങ്ങി പോവുമെന്ന് കരുതിയ റോസാ ചെടിയിൽ മൊട്ടു വിരിഞ്ഞിരുന്നു. ചുവരിലെ ആണിയിൽ കിടന്നു തൂങ്ങി കൊന്ത, രാത്രിയിൽ തിളങ്ങി പ്രേതങ്ങളെ ഓടിച്ചിരുന്നു. വരാന്തയിലെ കാറ്റു കൊണ്ട് തണുപ്പ് പിടിക്കാറുണ്ട്. ഞാനും മുറിയുമങ്ങനെ എത്രയെത്ര  രാത്രികൾ.... ? ചില്ലു ഭരണി, മേശയുടെ ഒരുവശം തിങ്ങി നിറഞ്ഞ് കൈറ്റ് റണ്ണർ, ...
കൂടുതൽ‍ വായിക്കൂ

നീര്‍കുമിളകള്‍

നീര്‍കുമിളകള്‍, ആകാശത്തേക്ക് പറത്തിവിട്ട് മേഘങ്ങളില്‍ മഴ വിത്തുകള്‍വിതയ്ക്കുന്ന ഒരുവന്‍ ആര്‍ക്കും കൊടുക്കില്ലെന്ന്‍ വാശിപിടിച്ചിട്ടും അത് വാങ്ങിച്ചെടുത്ത ഒരുവള്‍. ഒരു സന്ധ്യയില്‍ അവള്‍ക്കവനോടു പ്രണയം ..! അവനൊരു കിനാ റീലെടുത്ത് അവളുടെ നേരെ ഊതി ഇതിങ്ങനെ മതിയെന്ന്‍, ഒരു വെള്ളാനയുടെ അപ്പുറവും ഇപ്പുറവും നിന്ന്‍ അത് പൊട്ടാതെ ,തമ്മില്‍   നോക്കാമെന്നവന്‍ മിസ്റ്റര്‍ അലവലാതി അതെന്തിനാ അങ്ങനെയെന്നവള്‍ പൊന്നമ്പല്‍ പുഴ പാടമെന്നവന്‍ *        *               * സമയമായെന്നു തോന്നിയപ്പോ മഴനൂലിന്റെ അറ്റത്ത്  ഒരുമിച്ചൊരു കുമിളകൊട്ടാരം കേട്ടാമെന്നവന്‍ വൈകിപോയി  എന്നവള്‍ ചില്ല് പാത്രത്തില്‍ അവരുടെ മീനുണ്ടാക്കിയ കടുകുമണി കുമിളകള്‍ നോക്കി കാത്തിരിക്കാമെന്നവന്‍ നോക്കി നോക്കിയിരിക്കവെ, സമയമായപ്പോ ആകാശം കറുത്തിരുണ്ടാപ്പോ, അവള്‍ ഒരു വേനല്‍ തുള്ളിയില്‍ കുരുങ്ങി ഒലിച്ചുപോയി ! അവന്‍ തന്‍റെ നിശ്വാസങ്ങള്‍ തീര്‍നെന്നറിഞ്ഞ് ബാക്കിയായത...
കൂടുതൽ‍ വായിക്കൂ